حماتي قالت
لأول مرة ملقاش حاجة يرمي عليا اللوم فيها.
— مريم… أنا آسف.
بصيتله قدام كل الناس اللي واقفين.
— كنت هتتأسفلي لو مكنتش عرفت مين هو خالي؟
ماردش.
والسكوت ده أكدلي إن إمضتي على ورقة الطلاق مكنتش اندفاع ولا لحظة غضب.
في أواخر اليوم ده، شريف رجع بيتنا ولقى سعاد أمه منهارة ومش على بعضها.
— قول لمريم تتكلم مع خالها! مش معقول تسيبك تضيع مستقبلك وشغلك عشان مجرد خناقة بينكم!
شريف بصلها نظرة طويلة وفيه حزن مكتوم.
— يا أمي، التحقيق والمراجعة بدأوا من قبل الخناقة اصلاً.
— بس هي تقدر تتدخل وتصلح الموضوع!
— هو ده بالظبط أصل المشكلة!
لأول مرة يفهم الحاجة اللي حاولت أفهمهاله لسنين: إنه اتعود يقيم الناس على حسب منفعتهم ليه وفايدتهم لترقيته وسلطته. وسعاد كانت هي اللي بتغذى فيه النظرة دي كل يوم.
— لو كنتي تعرفي إن خالها هو رئيس مجلس إدارة الشركة، كنتي هتقولي إن ذكرى وفاة أباها المتوفي ممكن تستنى؟
سعاد ماقدرتش ترد.
— وأنا كمان مكنتش هحط ورقة الطلاق على الترابيزة.. وده أكتر حاجة مكسوف من نفسي بسببها دلوقتي.
تاني يوم الصبح، عمل حاجة مكنش حد يتوقعها. جمع الـ 3 موظفين اللي كانوا طالبين نقل من قطاعه.
— أنا مش جمعكم عشان أحاسبكم أو أعاقبكم.
محدش رد والكل كان قلقان.
— أنا عاوز أسمع منكم.. أنا غلطت في إيه؟
في الأول كانوا خايفين ومش مصدقينه، لحد ما واحدة اسمها هبة اتكلمت:
— الضغط مكنش أصعب حاجة.. الصعب كان إحساسنا إننا لو مش بنفكر بنفس طريقتك وبنوافقك على كل حاجة، بنبقى في نظرك فاشلين وملناش لازمة.
شريف نزل راسه في الأرض:
— أنا آسف.
محاولش يبرر موقفه، ومطلبش منهم يسامحوه عشان ينقذ شغله.. هو بس قعد يسمعهم للأخر.
أول ما خلص، ركب عربيته وجاي على بيت أمي في المعادي. كنت واقفة بلم الغسيل من البلكونة لما شفته طالع.
كان ماسك الورقة في إيده.. الورقة كان عليها توقيعه هو كمان.
— أنا كمان مضيت.
حسيت بوجعة في صدري.
— انت متأكد؟
— أنا مش جاي أضغط عليكي عشان ترجعي، ولا جاي أطلب إن خالك ينقذ أكل عيشي.
حط الورق على الترابيزة.
— أنا جاي أعتذر.
دخل الصالة اللي أمي حاطة فيها صورة بابا الله يرحمه والجمبها شمعة والورد. وقف قدام الصورة وبصلها.
— عم سيد الله يرحمه.. عمره ما سألني بقبض كام ولا معايا إيه لما جيت أطلب إيدك منه.
