رجعت من

السوشي؟ إحنا ضيوف في بيتك ولازم نضايف كويس، وإنتي فلوسك وخيرك كله من خير ابني!
ضحكت.. ضحكة قصيرة طالعة من قعر قلبي خلت حماتي تبرق وشيرين تتراجع خطوة لورا.
خير ابنك؟ قولت الكلمتين دول وأنا ببص لأحمد في عينيه مباشرة خير ابنك اللي بقاله تلت شهور سالف مني إيجار مكتبه الصوري؟ ولا خير ابنك اللي عايش في شقة ملكي أنا، من دم بابا وميراثي؟ ولا خير ابنك اللي سايبك يا طنط تسحبي من كارتي الشخصي كل أول شهر عشرين ألف جنيه عشان تجيبي دهب وتجددي عفش بيتك القديم وإنتي بتقوليلي دا دوا ومصاريف علاج؟
أحمد وشه احمر وبدأ يزعق عشان يغطي على الحقيقة متدخليش الأمور في بعضها يا ندى! إحنا بنتكلم في شغل! المقاول بره مستني التوقيعات، والراجل ده دفعنا له عربون بالفيزا الفرعية بتاعتي من أسبوعين وواقف على الدفعة الكبيرة اللي المفروض تخرج الليلة دي! انتي لما قفلتي الكروت ولغيتي التسهيل وقفتي المراكب السايرة! إنتي متخيلة لو البنك مطلعش القرض بكرة الصبح إيه اللي هيحصل؟! إحنا كاتبين شيكات ووصولات أمانة على نفسنا بالفلوس دي!
هنا وقفت قدامه بالظبط، وطلعت الفلاشة من جيبي ورفعتها قدام وشه. قصدك الشيكات اللي انت وشيرين ماضيينها على أمل إن قرض الشقة بتاعتي يطلع ويسددهم؟ قصدك الخطة اللي انتوا مرتبينها بقالكم ست شهور عشان ترهنوا الشقة وتعلوا التلت تدوار اللي فوق باسم شيرين، ولما القرض ميتسددش البنك يحجز على شقتي أنا ومرتبي أنا، وتطلعوا إنتوا كسبانين عمارة كاملة بضمان قفايا؟
الصالة اتقلبت سكوت تام. شيرين مسكت في إيد أمها، وبدأت شفايفها تترعش إنتي.. إنتي عرفتي الكلام ده منين؟ إنتي بتجسسي علينا؟
أحمد بلع ريقه بصعوبة، عينه نزلت على الفلاشة، وحاول يمد إيده عشان يخطفها مني، بس رجعت خطوة لورا وخبيتها في شنطتي ببرود.
الورق الأصلي بتاع الشقة محفوظ في مكان لو قعدت تدور عليه مية سنة مش هتعرف توصله قولتله ده وأنا بصلبه بنظرتي والتوكيل المزور اللي كنت فاكر إنك تقدر تستخدمه، اتلغى رسمياً في الشهر العقاري من أسبوع، وقدمت بلاغ إثبات حالة بالورق المسروق. يعني خطوتك الجاية لو فكرت حتى تلعب في أي مليم يخصني، مش هتكون في البنك.. هتكون في النيابة.
حماتي صوتها راح، قعدت على الكنبة وهي بتضرب صدرها يا فضيحتك يا أحمد! يا خراب بيتك يا ابني! الست طارت منها السيطرة وناوية تدبسنا في المحاكم!
أحمد كان بيتنفس بصعوبة، وشه اتغير 180 درجة، وبدأ يغير نبرته من الزعيق للتوسل الرخيص ندى.. اهدي بس يا ندى، إنتي فاهمة غلط والله، إحنا كنا بنعمل كل ده عشان مصلحة البيت! مصلحتنا كلنا! إنتي فاكرة إني ممكن أضرك أو أضر مريم؟ ده مشروع استثماري لينا كلنا، وإنتي كدة بتخربي كل حاجة! أنا عليا شرط جزائي لو القرض متنفذش هيتخرب بيتي وهيتحبس! إنتي عايزة أبو بنتك يتسجن؟
بصيتله من فوق لتحت، بالقرف اللي كنت شايلاه بقالي سنين وكنت بداويه بالصبر.
بيتك خرب من اللحظة اللي فكرت فيها إنك تسرقني وتستغفلني، ومن اللحظة اللي سمحت فيها لأمك تدخل بيتي وتكسر نفس بنتي وتمنع عنها اللقمة عشان تطفحوا إنتوا.
شيرين صرخت فجأة إنتي مفكرة نفسك مين يعني؟ خلاص هتلوي دراعنا بالقرشين اللي معاكي؟ طب والفلوس اللي المقاول خدها؟ والورق اللي اتمضى؟ هنعمل فيه إيه دلوقتي؟
بصيت لشيرين، وبعدين بصيت لأحمد، وقولتلهم بكل هدوء الدنيا تعملوا فيه اللي يعجبكم، تبيعوا دهبكم، تستلفوا، تدبروا نفسكم.. كل ده ميخصنيش في قرش صاغ واحد. بس قبل ما تفكروا في المقاول، إنتوا قدامكم نص ساعة بالظبط.
أحمد بصلي بذهول نص ساعة لإيه؟
شيلت شنطتي على كتفي، ووقفت عند باب الصالة وقولت بصوت حاسم مفيش فيه رجعة نص ساعة تلموا فيها كراكيبكم دي وتخرجوا برة بيتي. إنت، وأمك، وأختك. واللي هيفضل فيكم هنا بعد النص ساعة، أنا مش هتصل بالبوليس.. أنا هتصل بالمقاول نفسه اللي مستني فلوسه تحت، وأقوله إن الراجل اللي ماضي معاك ملوش أي مليم عندي ولا يملك في البيت ده حبة رمل واحدة، واخليه هو ييجي يتفاهم معاكم بنفسه على طريقته.
وش أحمد اصفر، لأن المقاول ده كان راجل تقيل ومبيفهمش غير لغة القوة والفلوس، والاسم لوحده كان كفيل يرعبهم.
حماتي بصت لابنها مستنية منه يرد أو يتخانق، بس أحمد فضل واقف متسمر في مكانه، باصص للورق المرمي على الأرض، وعارف إن اللعبة كلها اتقلبت عليه. بس قبل ما يفتح بوقه بحرف واحد، جرس الباب رن رنة طويلة ومرعبة.. وخبطات تقيلة وعنيفة بدأت ترزع على الباب من برة.