دخلت انضف

حكايات مني السيد حصري دخلت أنضف مطبخ حماتي، وفجأة عيني وقعت على كراتين جهاز أمي الجهاز اللي أمي كانت جايباهولي وحاطاه عندي تحت السرير.....!!!! بداية الحكاية يا بنتي، ادخلي نضفي المطبخ عندي بسرعة، أصل عندي ناس جايين ومش ناقصة دوشة. دي كانت جملة حماتي وهي واقفة على باب شقتي، باصة لي بنظرة آمرة ومستعجلة، كأن مطبخها أهم حاجة في الدنيا، وكأن نزولي أمر مفروغ منه. ما اعترضتش ساعتها. بلعت إحساس الضيق، لبست إسدال الصلاة ونزلت وراها. من يوم ما اتجوزت وسكنت في نفس العمارة، وأنا حاسة إن خصوصيتي مستباحة؛ حماتي متعودة تدس مناخيرها في كل تفصيلة، من أكلنا ولبسنا، لحد فرش الشقة والحاجات اللي أمي كانت بتشيلهالي من دم قلبها عشان تفرحني بيها. دخلت مطبخها وبدأت أنضف. الرخام، الحوض، والبوتاجاز. وأنا بزق شوية حاجات جنب الحوض عشان أطول الحيطة من ورا، عيني وقعت على كراتين متكومة في ركن بعيد ومستخبي، متغطية بملاية قديمة ومتربة. في الأول افتكرتها كراكيب عادية. بس وأنا بشد الملاية عشان أكنس تحتها، إيدي اتجمدت في مكانها والدم نشف في عروقي. الكراتين دي أنا حافرة تفاصيلها في دماغي. حصري على صفحة روايات و اقتباسات شريط اللصق البني المكتوب عليه اسم المحل، العلامات اللي بالقلم الفلوماستر الأزرق.. دي نفس الكراتين اللي كنت عيناهم بنفسي تحت سرير أوضة نومي في شقتي فوق! ده جهاز أمي.. الأطقم والمفروشات اللي كانت تشتريها لي واحدة ورا التانية، وتقولي كل مرة وهي بتطبطب على كتفي دي حاجتك يا نور عيني، شيليها عندك لوقتها، وماتفرطيش في فتلة منها. فضلت واقفة مش مستوعبة، عقلي عاجز يربط الخيوط الكراتين دي طلعت من تحت سريري إزاي؟ ومين دخل أوضتي ونقلها؟ وليه تتدارى بالملاية هنا في المطبخ تحت؟! قطع ذهولي صوت حماتي الحاد من ورايا، كأنه لسعة كرباج إنتي بتعملي إيه هناك ومسهمة في إيه؟ لفيت بهدوء تام، بس عيني كانت مركزة في وشها. شفت رعشة مفاجئة في جفونها، وملامحها اتبدلت في ثانية لرعب حاولت تداريه ورا قناع الزعيق ملكيش دعوة بالكراتين دي وماتقربيلهاش! بصيت لها بنظرة باردة ومنطقتش بحرف، فكملت بتوتر وهي بتبص حواليها ده.. ده جهاز البت! حاجات تخص بنتي وأنا شايلاها هنا، إنتي مالك إنتي؟ كملي اللي في إيدك! ما دخلتش معاها في جدال، ولا سألتها إزاي جهاز بنتها يخرج من تحت سرير نومي بكراتيني وعلاماتي. كملت المسح والتنضيف من برة لبرة، وإيديا بتتحرك آلياً، لكن جوايا كان بيغلي. طلعت شقتي ورجلي بالكاد شيلاني. أول حاجة عملتها إني وطيت على الأرض وبصيت تحت السرير.. كان فاضي، مفيش غير أثر تراب الكراتين اللي اتشالت في الخباثة. اتصلت بأمي وحكيت لها كل التفاصيل. أمي سكتت لحظة، وبعدها قالت بصوت حاسم يوجع الحاجة اللي تتاخد في الضلمة ما يتسكتش عليها يا بنتي. اللي يمد إيده على قشاية من تحت سريرك، بكرة ياخد الباب كله.. حاجتك ترجع مكانها فوراً. قفلت مع أمي، والشك بدأ يتحول ليقين؛ الموضوع مش مجرد ست طماعة بتجهز بنتها على قفا مرات ابنها، في حلقة مفقودة في السلسلة، ودخول أوضة نومي وراها مفتاح تاني أنا معرفش عنه حاجة. استنيت كام يوم لحد ما جت اللحظة المناسبة قرايب حماتي كان عندهم فرح، واتشيكت ونزلت من العصر. أول ما سمعت صوت الباب بيتقفل وعربيتها بتتحرك، نزلت شقتها بهدوء وثبات. دخلت المطبخ، شلت الكراتين كرتونة كرتونة، وطلعتهم شقتي ورجعتهم مكانهم تحت السرير. وقبل ما الليل يدخل، جبت نجار، وغيرت قلب كالون باب الشقة، وغيرت قفل أوضة النوم تماماً، وحطيت المفاتيح الجديدة في جيبي. تاني يوم الصبح، صوت زعيق ورزع على الباب صحى العمارة كلها. حماتي كانت واقفة قدام شقتي، وشها محتقن وعينيها بتطق شرار فين الكراتين اللي كانت تحت؟! وديتي حاجتي فين يا خطافة؟! فتحت الباب نص فتحة، وابتسمت ببرود أشد من التلج حاجاتي ورجعت مطرحها الأصلي.. تحت سريري. اتنفضت وصرخت حاجاتك إيه؟ دي حاجات بنتي! إنتي فاكرة نفسك داخلة على طمع؟! رديت بهدوء قاتل، وبنبرة مافيهاش ذرة تردد والله ما في معلقة واحدة نزلت من عندي من غير حق. ده شقا أبويا وأمي اللي تعبوا فيه سنين، وكراتين محلي وعلاماتي عليها. وعشان نريح بعض بقى.. نلم الجيران دلوقتي، ونجيب خالاتي والناس اللي فرشوا معايا الشقة والشهود اللي حضروا نقل العفش، ونفتح الكراتين قدام العمارة كلها، ونشوف الفواتير باسم مين والكراتين كانت فين ومين نقلها.. وتبقى الفضيحة بجلاجل وبأصولها. الكلمة نزلت عليها زي الصاعقة. وشها بهت، وصوتها اللي كان بيهز البيت اتخنق فجأة. بلعت ريقها بالعافية، وعرفت إنها لو كملت، مش بس هتتكشف، دي هتتفضح في أصل أمانتها. سكتت، وقبل ما تنزل درجة واحدة، لفت لي وبصت لي بنظرة مرعبة.. نظرة مافيهاش غيظ العجايز العادي، نظرة خوف حقيقي، وقالت بصوت واطي فحيحه يرن إنتي مش فاهمة حاجة.. وإنتي اللي جنيتي على نفسك، ومش عارفة إنتي فتحتي على روحك إيه! نزلت، والجملة دي لزقت في عقلي زي المسمار. قفلت الباب ووقفت مكاني وسألت نفسي ليه الرعب ده كله؟ وليه تخبي حاجة هتروح لبنتها في مكان مترب زي المطبخ تحت الملاية وماتحطهاش في شقة بنتها أو في أوضتها المقفولة؟ دخلت أوضة النوم، وسحبت أول كرتونة كانت أثقل من الباقيين، وقررت أفتحها عشان أتأكد إن مفيش حاجة لمحة نيوز نقصت.. لكن أول ما قطعت اللصق وشلت طبقة البشاكير اللي على الوش، لقيت تحتيها حاجة مستحيل تكون من ضمن جهازي.. ولا جهاز بنتها. واللي شفته جوة، كان أكبر وأخطر بكتير من مجرد أطقم حلل وشوية كراتين. قفلت باب أوضة النوم بالمفتاح الجديد وسمعت صوت التكة بترن في أركان الأوضة الفاضية. قلبي كان بيدق في وداني بصوت عالي كأنه طبلة، وإيدي كانت بتترعش وأنا ماسكة المقص الصغير. قعدت على ركبي قدام الكرتونة التقيلة. دي كرتونة طقم الحلل الجرانيت، أكبر واحدة فيهم والوحيدة اللي كان مقفول عليها بكذا طبقة لصق عريض زيادة عن اللزوم، ومحطوطة تحت سريري من يوم الفرح متفتحتش. لما نزلتها من شقة حماتي كانت تقيلة بطريقة مش منطقية، شيلتها بصعوبة وأنا طالعة السلم وقولت يمكن عشان ألمونيوم ولا صاج مع الجرانيت، بس الإحساس بالشك كان بياكل في بطني زي السوس. شديت اللصق بالمقص، وصوت تشريحه قطع السكون اللي كان مالي الشقة. فتحت الدرفتين الكرتون، كان أول حاجة على الوش فوطتين كبار وبشاكير قطن بتوعي اللي ماما مطرزاهم بإيدها، شيلتهم على جنب بحذر كأني بفتش في قنبلة مش في جهاز عروسة. تحت الفوط، كان المفروض ألاقي كراتين الحلل الصغيرة. بس ما لقيتش علب. لقيت قماش قطيفة نبيتي قديم وملفوف حوالين حاجة جامدة، ومربوط بأستك عريض ومزنوق بين حواشي الكرتونة بإحكام غريب. مديت إيدي وأنا حابسة نفسي، شديت أول لفة قطيفة، وفككت الأستك براحة. القماش اتفتح بين إيديا، وبان لمعان باهت لمعدن تقيل ومطفي، مش صيني ولا كريستال. كانت سبيكة دهب صغيرة، وعليها أختام مش مصرية، وجنبها كيس قماش شفاف فيه كومات غوايش وخواتم متقطعة ومشوهة ومكسورة، كأنها متجمعة من كذا حتة، وورق مالي مطبق بطريقة متقنة، دولارات ملفوفة برباطات بنكية تاريخها من سنين. رجعت لورا لزقت ضهري في حافة السرير، ونفَسي اتقطع. دهب كسر، سبائك، وفلوس خضرا متكومة في كرتونة جهازي؟ الحاجات دي متسواش ملاليم، دي تتعدى مئات الآلاف، وممكن تعدي الملايين! إزاي الحاجات دي دخلت هنا؟ ومين حطها؟ مديت إيدي بالراحة في قعر الكرتونة وكملت تفتيش، يمكن ألاقي أي حاجة تفسر الكابوس ده. لقيت دفتر شيكات قديم باسم واحد عمري ما سمعت عنه، وورقة مبايعة لأرض في الصعيد، وأهم من ده كله.. صورة قديمة أبيض وأسود فيها عمي الله يرحمهحماياوهو واقف جنب راجل وشه مش غريب عليا، بس ملامحه متجهمة وعنده علامة جرح واضحة فوق حاجبه. وفجأة، شفت دفتر جيب صغير جلده متقشر ومربوط بخيط أسود. فتحته بإيد مرتعشة. كان بخط إيد حماتي، خطها الرديء اللي بحفظه من ورقة الطلبات اللي كانت بتسيبها على الباب. أسماء، وأرقام، وتواريخ باليوم والشهر، وجنب كل اسم كلمة واحدة سداد، مستحق، محضر. قعدت في مكاني مش قادرة أقوم ولا أفكر، والدنيا لفت بيا. الكراتين دي ما كانتش مسروقة عشان بنتها تتجوز بيهم، الكراتين دي كانت الخزنة المستخبية! حماتي كانت واخدة كراتين جهازي ستار، عشان دي الحاجة الوحيدة في البيت كله اللي محدش ممكن يشك فيها لو البيت اتفتش، ومحدش هيدور ورا جهاز عروسة مركون تحت السرير لحد ما تحتاجه. ولما نقلتهم لتحت في المطبخ وغطتهم بالملاية، مكنتش بتسرقني.. كانت بتنقل المصيبة دي لمكان أسهل عليها في الحركة، بس اتفاجأت بيا نازلة أنضف قبل ما تلحق تصرفهم! طب وطارق؟ جوزي عارف بالموضوع ده؟ طارق، الموظف الغلبان اللي بيخرج من تمانية الصبح لحد تسعة بالليل عشان يسد جمعية وأقساط عفش الشقة، طارق اللي لسه مسلفه منه أول إمبارح عشرة آلاف جنيه من دهبي عشان نصلح العربية، كان شريك في المصيبة دي ولا زيي أطرش في الزفة؟ فكرة إن طارق يكون عارف خلت جسمي كله يقشعر من الخذلان. بس قبل ما أكمل فكرتي، سمعت صوت حركة تحت في المدخل. صوت خطوات تقيلة وسريعة بتطلع السلم، مش خبطة حماتي المترددة. دي خطوات حد مستعجل وعارف هو رايح فين. جمدت مكاني. بصيت حواليا في الأوضة، الحاجة كانت متبعترة على السجادة الدهب، الورق، الفلوس، والمقص في إيدي. بسرعة جنونية، لميت كل حاجة ورجعتها جوة القماش النبيتي، رميتها في الكرتونة، وحطيت البشاكير فوقيها، وقبل ما أقفل درف الكرتونة، سحبت الموبايل وصورت كل ورقة، وصورت السبيكة بختمها ودفتر الشيكات والصورة القديمة في لقطات سريعة واضحة، ورفعت الصور كلها على إيميل سري ماليش غيره عشان لو الموبايل حصله حاجة. رجعت الكرتونة مكانها بعنف وزقيتها برجلي تحت السرير، وقومت عدلت هدومي وطرحتي، ومسحت عرق بارد كان مغرق جبهتي. وفجأة، جرس الشقة رن. مش رنة عادية. ده كان ضرب متواصل، تكتين ورا بعض، وبعدين رزع خفيف على الخشب. روحت ناحية الباب على طراطيف صوابعي، وبصيت من العين السحرية. كان راجل طويل، لابس قميص كحلي كاجوال، باين عليه في أواخر الأربعينات، وشه صارم جداً، ومعاه شنطة جلد صغيرة تحت باطه. واقف وباصص في الأرض ومستني، وورا الراجل ده بمسافة درجات سلم، كانت حماتي واقفة، باصة لفوق ووشها أصفر زي الليمونة ومكتومة في عياط مكتوم. الراجل مد إيده ورن تاني، وبعدها قال بصوت واطي بس واصل من ورا الباب افتحي يا أستاذة نورهان، إحنا مش جايين نعمل دوشة، عايزين كلمتين بالعقل وخلاص. عرف اسمي منين؟ مسكت أكرة الباب جامد، واتكلمت من غير ما أفتح، بصوت حاولت على قد ما أقدر أخليه ناشف ومش خايف مين حضرتك؟ وطارق مش هنا، لو في حاجة تعالوا لما جوزي يرجع. الراجل اتنهد تنهيدة طويلة، وبص على العين السحرية كأنه شايفني أنا عارف إن طارق مش هنا، وعارف إنه في شغله في مصر الجديدة، والموضوع ملوش دعوة بطارق أصلاً، الموضوع يخص الست والدتك ويخص الأمانة اللي نزلتيها من شقة الحجة تحت من ساعتين. الأمانة اللي تخص والدتي؟! الدم غلي في عروقي. هو بيتكلم عن أمي أنا؟ فتحت الباب وسبت السلسلة متعلقة، وبصيت له من فتحة الباب الضيقة أمانة إيه وأمي مين؟ إنت مين أصلاً وجاي بيتي بصفتك إيه؟ وحماتي جيباك هنا ليه؟ حماتي طلعت درجة بسرعة، ومدت إيدها تحاول تمسك كتف الراجل عشان تهديه، وقالتلي بصوت مخنوق ومترجي عمري ما سمعته منها افتحي يا نورهان يا بنتي.. افتحي ده الأستاذ معتز، المحامي بتاع المرحوم عمك، والراجل ده جاي يحل، افتحي متخربيش بيتك بإيدك! معتز ابتسم نص ابتسامة هادية بس فيها غدر واضح، وطلع من جيبه بطاقة كارنيه نقابة المحامين وميلها قدام الفتحة عشان أشوفها يا مدام نورهان، إحنا ناس ولاد حلال وبنتكلم بالقانون وبالأصول. الكراتين اللي نزلتيها دي مش جهاظك، دي فيها ورق وتصفيات تركة تخص ورثة عمك الله يرحمه في البلد، وحماتك كانت شايلاها هنا عشان كان في نزاع عليها في المحاكم، وتفتيشك في الحاجات دي هيورطك في قضية إخفاء أموال ومستندات رسمية. كلامه كان مترتب وجاهز، كأنه حافظه من سنين، بس هو ميعرفش إني شفت اللي جوة، ميعرفش إني شفت الدهب المكسور والفلوس وتواريخ الدفتر اللي مكتوب فيها أسماء ناس ميتين وناس عايشين. قلت له ببرود كراتين جهازي عليها اسم معرض التوحيد في شبرا، وعليها اسم أمي ورقم تليفونها بالماركر، والكالون بتاع أوضة نومي اتغير، ومفيش ورقة واحدة طالعة من شقتي غير لما طارق يجي ويكون معايا، ويا مرحب بالحكومة والمحاكم، خلوا المباحث تيجي تفتح الكراتين قدام الناس كلها ونشوف الإخفاء ده بتاع مين وباسم مين! وش معتز اتقلب في ثانية. البرود والهدوء اللي كان عليه اتبخر، وظهرت الشراسة الحقيقية ورا وشه المنمق. قرب وشه من فتحة الباب وهمس بلاش نكبر الموضوع يا نورهان.. طارق شاب في أول حياته ومش حمل قضايا، ووالدتك ست مريضة سكر وضغط ومش حمل فضايح في منطقتها. الحاجة دي هتخرج من هنا بالهدوء، وحماتك هتديكي حق جهاظك وزيادة عليه مية ألف جنيه تفرشي بيهم شقة جديدة في أي حتة تانية غير هنا، لكن لو راسك نشفت.. أنتي اللي هتكوني كبش الفدا، والكراتين دي هتبقى حبل المشنقة اللي حوالين رقبة جوزك. حماتي مسكت في ذراعه وقالتله اهدى يا معتز، البت متفهمش، متدخلش طارق في الليلة، طارق ملوش ذنب! هنا بقى الخيط اتفك تماماً في دماغي. حماتي مش قوية زي ما كانت بتمثل، حماتي كانت مجرد أداة، ومربوطة من إيدها اللي بتوجعها. ومعتز ده مش مجرد محامي تركة، ده الراجل اللي بيدير اللعبة دي كلها، وطارق.. طارق فعلاً ملوش ذنب، أو على الأقل مش هو المحرك الأساسي، بس هما مستعدين يضحوا بيه لو الحبل ضاق عليهم. قفلت الباب في وشه ورزعت الترباس، ومردتش على صوت خبطه. افتحي يا نورهان بدل ما نتصرف تصرف تاني مش هيعجبك! صوت معتز كان عالي المرة دي، فيه توتر مكتوم، بيخبط برجله على الباب. جريت على الأوضة، طلعت تليفوني بسرعة، وكتبت رسالة لأمي بكلمات مشفرة إحنا متفقين عليها عشان متتخضش ماما، خالي يجيلي حالا ومعاه عمي حسين ضروري، فيه ناس عند الشقة بيتبلوا علينا في موضوع الجهاز، بسرعة. وبعدها، طلبت رقم طارق. التليفون رن.. رنة.. اتنين.. تلاتة. كنت بدعي ربنا يرد قبل ما اللي برة دول يكسروا الباب، أو حماتي تفتح بالمفتاح الاحتياطي اللي كانت عاملاه للباب الخارجي زمان قبل ما أغير الكوالين. طارق رد، وصوته كان باين فيه دوشة الشغل ومطحون بين الورق والعملا ألو، إيه يا نورهان؟ في حاجة ولا إيه؟ أنا في اجتماع مع المدير ومش فاضي. طارق، اسمعني كويس وبلاش مقاطعة، صوتي كان بيترعش بس حازم لدرجة خلته يسكت فوراً. حماتك واقفة على باب شقتنا، ومعاها واحد اسمه معتز بيقول إنه محامي أبوك، بيهددوني عشان الكراتين اللي كانت تحت السرير وكنت حاطة فيها جهازي. طارق سكت خالص لدرجة إني افتكرت الخط قطع. ألو؟ طارق إنت سامعني؟ جاني صوته بس نبرته كانت متغيرة تماماً، نبرة واحد فجأة الدنيا وقعت فوق دماغه نورهان.. هو معتز عندك في البيت؟ فوق عند الشقة؟ أيوه برة على الباب وبيخبط وعايز الكراتين وبيقولي إنه هيلبسها فيك وفي أمي، فهمني يا طارق، في إيه جوة الكراتين دي غير الدهب والفلوس اللي شفتها؟! إنت عارف بالمصيبة دي؟! طارق اتنهد تنهيدة كأن روحه بتطلع منها، وقال بصوت مهزوز ومرعوب إنتي فتحتيها يا نورهان؟ شوفتي اللي جوة؟ يا نهار أسود.. يا نهار أسود! اسمعيني، إياكي تفتحي الباب، متفتحيش لأي مخلوق لحد ما أنا أوصل، ومعتز ده متمكنيهوش من ولا فتلة، الكراتين دي لو خرجت من الشقة.. أنا وأمي هنروح ورا الشمس بجد! يعني إنت كنت عارف؟ سألته بمرارة ووجع حسيت بيه في عضم صدري. والله العظيم ما كنت أعرف إنها عندك في الشقة! أنا كنت فاكر أبويا صفا الموضوع ده ومات وخد سره معاه، لكن أمي هببت إيه وودتهم عندك إزاي أنا معرفش! أنا جاي في الطريق حالاً، ربع ساعة وأكون عندك، أوعي تفتحي يا نورهان، معتز مش محامي.. معتز ده كان شريك أبويا في مصايب الجمارك والدهب المهرب! الخط قفل في وشي. الجمارك والدهب المهرب. حمايا اللي كان الكل بيحلف بأدبه وتقواه، كان شغال في التهريب؟ والفلوس والدهب دي بقايا بضاعة قديمة معتز جاي يطالب بنصيبه فيها، وحماتي شايلاها وبترميها في جهازي عشان لما تتقفش تقول دي مرات ابني وأهلها هما اللي جايبينها؟! بصيت على الكرتونة اللي تحت السرير، وحسيت إن الشقة كلها بتضيق عليا، الحيطان بتميل. الخيانة ما جتش من الشارع، الخيانة كانت متبيّتة تحت السرير اللي بنام عليه بقالي سنة كاملة. الخبط على الباب هدي شوية، بس سمعت وشوشة برة.. صوت حماتي وهي بتعيط وتقول لمعتز الحق يا معتز، البت رنت على طارق، زمانه جاي.. ولو جه هيفضح الدنيا، الواد على نياته وهيضيعنا! معتز رد بصوت قاطع وبارد طارق مش هيعمل حاجة عشان أمه، هو بس لو حاول يتذاكى هنديله قرصة ودن صغيرة تفوقه.. رني إنتي على سيد البواب وقوليله يقطع النور عن الشقة دي من تحت، وخلينا نخلص الليلة دي قبل ما عيلة البت دي تهل. سمعت الكلمة، وجسمي كله اتشد. النور؟ فجأة، تكة المفتاح العمومي سمعتها من بعيد، والمروحة اللي كانت شغالة في السقف وقفت، والتكييف سكت، والدنيا كلها ضلمت في الصالة، ما فضلش غير ضوء الشمس الباهت اللي داخل من شباك المطبخ الصغير. حسيت ببرودة في أطرافي، هما مش بس عايزين الحاجة، هما بدأوا يحاصروني جوة بيتي، وفاكرين إني ست ضعيفة هتستسلم أول ما النور يقطع وتسمع تهديدين. روحت على المطبخ بخفة، مديت إيدي على حامل السكاكين، وسحبت أكبر سكينة عندي وحطيتها في كم الإسدال. ورجعت على الأوضة، قفلتها ورايا بالمفتاح الجديد من جوة، وقعدت جنب الكرتونة على الأرض في الضلمة. طلعت الموبايل، وبصيت على شاشته المنورة في العتمة.. كان في رسالة من أمي وصلت أخوكي حسام وخالك وراهم اتنين رجالة طالعين على العمارة بعربيتين، خمس دقايق ويكونوا عندك. وفي نفس اللحظة، سمعت صوت حد بيدخل حديدة رفيعة في كالون باب الشقة اللي برة وبيحاول ينطره.. معتز مش مستني طارق يوصل، معتز قرر يقتحم الشقة وياخد حاجته بإيده. رفعت راسي، وبصيت للباب المقفول عليا في العتمة، وأنا حاسة بنار بتغلي جوايا.. لو فاكرين إني هكون الضحية اللي يلبسوها مصايبهم ويسكتوها بشوية ملاليم، يبقوا لسه ميعرفوش مين هي نورهان، ولا يعرفوا أنا ممكن أعمل إيه عشان أحمي نفسي وأهلي من الوساخة دي. صوت الحديدة وهي بتنخر في كالون باب الشقة البراني كان زي دبوس بيغرز في ودني. تكة.. وراها عتلة خفيفة.. وصوت حماتي برة بتوشوش برعب وتقول لمعتز: — «براحة يا معتز، الجيران في التالت سامعين، الهامش ده هيلم علينا الناس!» ومعتز يرد عليها بنرفزة وهو بينفخ: — «اخرسي إنتي! لو الواد طارق وصل قبل ما نسحب الليلة دي، مش هنعرف نلمها.. بتك دي حرباية ومصورة كل حاجة، لازم الشنطة تخرج والورق يتحرق الليلة!» أنا جوة أوضة النوم المقفولة، الضلمة حواليا خانقة بعد ما قطعوا النور من تحت، بس الحواس كلها كانت صاحية على الآخر. إيدي اليمين كانت ماسكة السكينة من تحت كم الإسدال، وصوابعي الشمال دايسة على زرار التسجيل في الموبايل. أيوة.. مكنتش قاعدة بعيط ولا بندب حظي. شغلت مسجل الصوت ورميت الموبايل قريب من عتبة باب الأوضة من جوة عشان يلقط كل حرف، ورجعت قعدت على الأرض جنب كرتونة المصايب. فجأة، طرقعة جامدة خلت قلبي ينط.. الكالون البراني نطر! سمعت صوت الباب بيتفتح ويزيق، وخطوات معتز التقيلة وهو بيدخل الصالة، تزييق الجزمة الجلد على السيراميك، ووراه شبشب حماتي بيجرجر في الأرض بخوف وتردد. — «هي فين؟ في الأوضة دي؟» صوت معتز كان طالع من الصالة، بارد وفيه غل. — «أيوة، أوضة النوم.. بس البت مغيرّة القفل بتاعها، مش هتعرف تفتحه بالسهل.» معتز مقطعش وقت، قرب من باب أوضة النوم ورزع عليه رزعة بإيده الشمال خلت الخشب يرن في دماغي: — «افتحي يا نورهان بدل ما أكسر الباب فوق دماغك! متفكريش الحركة القرعة دي هتدخل عليا.. هاتي اللي جوة الكرتونة بالذوق، واطلعي منها، وإلا والله ما طالعة من الشقة دي على رجليكي!» قومت وقفت على حيلي بهدوء تام، قربت من الباب لدرجة إني بقيت سامعة نفسه العالي من ورا الخشب، واتكلمت بصوت واطي بس فيه ثبات كأنه صخر: — «اكسر يا معتز.. اكسر يا شريك المهربين. اكسر عشان بصماتك تيجي على خشب شقتي، والنيابة لما ترفع البصمات وتلاقي التسجيل اللي بصوتك وإنت بتهددني بالقتل وبتتكلم عن الدهب المهرب والجمارك.. ساعتها متلومش إلا غباءك.» السكوت اللي حل في الصالة كان عامل زي التلج. معتز وقف مكانه. حماتي برة شهقت شهقة مكتومة: — «تسجيل إيه؟! البت بتسجل لك يا معتز؟! قولتلك من الأول بلاش الشغل ده، البت دي مش سهلة!» معتز اتعصب وصوته وطي لفحيح تعبان: — «بتسجلي؟ فاكرة البوليس هينجدك؟ ده أنتي أول واحدة هتتسحبي في القضية دي، الكراتين باسم عيلتك وفي شقتك، والدهب ده لما يتمسك هيروح في بطنكم كلكو!» لسه هرد عليه، وسمعت صوت عربيات بتقف تحت في الشارع بفرملة حامية وصوت كوتشات بتصرخ على الأسفلت. وراها مباشرة، صوت رزع أبواب عربيات، وصوت رجالي بيهز عمارة السكن كلها من المدخل تحت: — «افتح يا سييييد! افتح الأسانسير يا حيوان، مين اللي قاطع النور عن شقة أختي؟!» صوت حسام أخويا! قلبي رجع يدق، بس المرة دي بنار الأمان والعزوة. معتز سمع الصوت برة واتسمر. حماتي جريت على باب الشقة تبص من البلكونة، ورجعت بتصرخ بهستيريا: — «يا مصيبتي! يا مصيبتي السودة! دول جايبين رجالة معاهم، وعربيات واقفة قافلة الشارع.. الحقنا يا معتز هنعمل إيه؟!» — «اسكتي جاتك مصيبة!» معتز اتلخبط، ضرب على باب الأوضة برجله ضربة عمياء: «افتحي يا نورهان هاتي الورق بس! هاتي الدفتر وسيبك من الدهب والزفت!» وفوق صوت حسام اللي كان طالع السلم جري بنهجة غضب، سمعت صوت تالت.. صوت مألوف ومخنوق، صوت طارق وهو بينادي على السلم بنفَس مقطوع: — «يا حسام استنى! يا حسام افهم مني الأول، متدخلش الشقة كده!» — «أفهم إيه يا ابن الـ...؟ أختي لو جرالها حاجة تحت إيد أمك هطربق العمارة دي على كراسيها!» في ثواني معدودة، باب الشقة البراني دخل منه إعصار. حسام أخويا كان أول واحد يقتحم الصالة، ووراه خالي الحاج رشاد—راجل ستيني بس هيبته تهز بلد وراجل تاجر كبير في الغورية—ومعاهم اتنين من شباب العيلة، وطارق كان وراهم ببدلته المتشرمطة من الجري وكرافتته مفكوكة وعينه حمرا من الرعب. الصالة بقت مسرح حرب في لحظة. حسام أول ما لمح معتز واقف قدام باب أوضة نومي وفي إيده المفك والحديدة، محطش منطق ولا اتكلم.. هجم عليه زي الأسد وجابه من قفاه ورزعه في الحيطة اللي جنب الباب: — «إنت مين يا روح أمك؟! واقف على باب أوضة نوم أختي بتعمل إيه وبتهبب إيه في الضلمة؟!» معتز حاول يتفاصح ويزق حسام: — «نزل إيدك يا بني آدم إنت! أنا محامي وممكن أحبسك في مكانك، إنت مش عارف بتتكلم مع مين!» خالي رشاد دخل بخطوة هادية بس حازمة، مسك حسام من كتفه وقاله: — «اهدى يا حسام، نزل إيدك من عليه دلوقتي، الحساب مش بالعافية.. الحساب بالأصول والقانون.» بص خالي على حماتي اللي كانت كاشة في ركن الصالة ولابسة طرحتها بالمقلوب وبتترعش، وبص لطارق اللي واقف مسهم كأنه تايه، وبعدين خبط على باب أوضتي بهدوء: — «افتحي يا نورهان يا بنتي.. خروجتك في حمايتي، افتحي.» فتحت القفل. المفتاح دار في الكالون وصوته طلع نقي في وسط الهدوء المتوتر. فتحت الباب وخرجت. كنت واقفة بإسدالي، رافعة راسي، الموبايل في إيدي الشمال والتسجيل لسه شغال، وعيني راحت على طارق مباشرة. طارق أول ما شافني، وشه كان مليان خزي وكسوف وعجز عمري ما شفته فيه. نزل عينه في الأرض ومقدرش يثبت نظره عليا. حماتي أول ما شافتني بدأت تولول بصوتها العالي المعتاد، فاكرة إن الشوشرة هتضيع الحقيقة: — «الحقني يا طارق! الحقني يا ابني، مراتك سارقة حاجات أختك ومستولية على أمانات المرحوم أبوك، وبتتبلى عليا وجايبة أهلها يتهجموا على بيتي في نصاص الليالي!» بصيت لها بنظرة شلّت لسانها، ومطلعتش كلمة زعيق واحدة. مديت إيدي، دوست على تليفوني وفتحت السبيكر، وصوت معتز الرنان وحماتي ملى الصالة بوضوح مفيهوش شك: («اخرسي إنتي! لو الواد طارق وصل قبل ما نسحب الليلة دي، مش هنعرف نلمها.. بتك دي حرباية ومصورة كل حاجة، لازم الشنطة تخرج والورق يتحرق الليلة!») («افتحي يا نورهان هاتي الورق بس! هاتي الدفتر وسيبك من الدهب والزفت!») الصالة كلها نزلت عليها صاعقة. معتز وشه بقى زي الجير، وطارق رفع راسه وبص لأمه بصدمة واحد لسه واخد طلقة في صدره: — «أمي.. الكلام ده حقيقي؟ أنتي كنتي متفقة مع معتز على كدة؟ ده أنتي حلفتيلي على المصحف في التليفون إنها شوية ورق أراضي بتوع أبويا ونورهان شايلاهم عندها بالغلط!» لمحة نيوز حماتي بلعت ريقها، لسانها اتشل، ومبقتش عارفة تقول إيه. دخلت الأوضة، وجريت الكرتونة لبرة في نص الصالة قدام الكل، شديت الفوط من فوقيها ورميت القماش النبيتي اللي ملفوف حوالين السبائك والدهب الكسر ودفتر الشيكات والصورة القديمة على ترابيزة الصالة. خالي رشاد راجل تاجر وفاهم الدهب والأصول، قرب من الطاولة، مسك سبيكة وبص لختمها، وبص للدفتر المكتوب فيه الأسماء، وبعدها رفع عينه لمعتز وقال ببرود قاتل: — «دهب مهرب بدون دمغة مصلحة الموازين، ودفتر استلامات بأسماء تجار خان الخليلي والمشهد الحسيني.. دي البضاعة اللي اختفت من خمس سنين لما حما طارق اتوفى فجأة وشركاه قلبوا الدنيا عليها.» خالي لف لطارق وقال له: — «أبوك الله يرحمه كان واقع في مصيبة تهريب، ومات قبل ما يسويها، وأمك ومعتز ده شالوا المصيبة دي.. ولما اتزنقوا وخافوا من التفتيش أو الحكومة تشم خبر، أمك استغلت جهاز بنتي الغلبانة اللي أمها جايباه بشقاها، ورمت البلا في كراتينها وتحت سريرها عشان لو وقعت، بنتي هي اللي تشيلها!» طارق وقع على ركبه على أقرب كرسي، حط إيده على راسه وبكى زي العيال الصغيرة: — «والله العظيم ما كنت أعرف.. والله العظيم يا عمي رشاد ما كنت أعرف إنهم مدخلين نورهان في حاجة زي دي، أنا كنت فاكر حوارات ديون عادية ومعتز بيسويها!» معتز لما لقى المركب بتغرق، حاول ينط منها.. مد إيده ياخد شنطته والورق من على الترابيزة: — «الموضوع ميهمنيش.. أنا محامي وبقوم بشغلي، والورق ده يخص ورثة وأنا هاخده وأمشي، وأنتوا صفوا حساباتكم العائلية مع بعض.» حسام أخويا كان أسرع منه، حط إيده على صدر معتز ورجعه مكانه بعنف: — «تمشي فين يا شاطر؟ ده دخول الحمام مش زي خروجه! أنتي فاكر نفسك في فيلم عربي هتهدد وتهوش وتمشي؟ البوليس تحت العمارة أصلاً!» معتز اتنفض وبص للبلكونة برعب: — «بوليس إيه؟ أنتوا طلبتوا النجدة؟» خالي رشاد طلع تليفونه، وبص لمعتز وقال له: — «أنا مكلمتش النجدة العادية.. أنا مكلم العميد مدحت في مباحث الأموال العامة، وهو على وصول، لأن البضاعة دي مسروقة ومهربة، وإحنا ناس شرفا، ولادنا ميعيشوش في الحرام ولا يشيلوا شيلة حد.» الرعب اللي ظهر على وش معتز وحماتي في اللحظة دي كان كافي يشفي غليلي من كل إهانة ومن كل كلمة تقليص كانت حماتي بتقولهالي من يوم ما دخلت البيت ده. معتز قعد على الأرض جنب رجل خالي، يتوسل: — «يا حاج رشاد استهدى بالله! إحنا ولاد سوق ونفهم بعض.. الحاجة دي تتقسم، والفلوس اللي فيها تطلعوا بنصيبكم منها ونسيب البلد كلها ونمشي، بلاش حبس وفضايح، أنا عندي عيال!» خالي زقه بجزمته بعيد عنه وقال له بقرف: — «فلوس الحرام سيبناها لأهلها.. بنتي خرجت من بيتي بكرامتها، وهترجع لبيتي بكرامتها وراسها مرفوعة، وشقى أبوها النضيف برقابكم كلكو.» بصيت لطارق.. كان باصصلي بنظرة رجا مكسورة، وقال بصوت متقطع: — «نورهان.. هتمشي؟ هتسبيني في الليلة دي لوحدي؟ أنتي عارفة إني بحبك وإني مليش ذنب في وساخة أبويا وأمي!» وقفت قدامه، وبصيت في عينه بنظرة صافية تماماً، مفيهاش ذرة غل ولا ذرة ضعف: — «إنت ملكش ذنب في اللي عملوه يا طارق.. بس ليك ذنب في إنك كنت سايب أمك تدوس على كرامتي وتتحكم في شقتي وأوضة نومي لحد ما وصلت لكدة. اللي ميعرفش يحمي باب بيته وميعرفش يوقف أمه عند حدود الأدب والأمانة، ميستاهلش واحدة تشيل اسمه. جهاز أمي اللي كانت بتستكترة عليا تحت السرير ده شرفي وعزة نفسي، وأنتوا كنتوا عايزين تحرقوني بيه.» خلعت الدبلة من صباعي، وحطيتها على الترابيزة جنب الدهب المهرب والسبائك: — «حاجتي وقايمتي وجهازي هيخرجوا دلوقتي في العربيات اللي واقفة تحت.. والمباحث لما تيجي، أنا بنفسي هسلمهم التسجيل والصور عشان أثبت إن مفيش فتلة من العفن ده تخصني أنا ولا أهلي. وإنت يا طارق.. ورقتي توصلي على بيت أبويا بالمعروف، زي ما دخلنا بالمعروف.» مستنتش رده. في ظرف ساعتين، كانت الأمور كلها اتحسمت بنظام وعدل مكنتش أحلم بيه. عربيات الشرطة والمباحث جت، واستلمت معتز والدفاتر والدهب، والتسجيل اللي سجلته على موبايلي كان هو الدليل القاطع اللي برأني أنا وطارق تماماً من أي تهمة تستر أو حيازة، وحط معتز وحماتي في مواجهة صريحة مع قضية تهريب وتهرب جمركي وإخفاء أموال مسروقة. وحماتي.. الست اللي كانت داخلة عليا بصلابة وجبروت تقولي "ملكيش دعوة ده جهاز بنتي"، نزلت في إيد المباحث وهي متغطية بملايتها من الكسوف، وجيران العمارة كلهم واقفين في البلكونات بيتفرجوا على اللي كانت عاملاها ست الستات وهي نازلة في بوكس الحكومة، والفضيحة مبقتش بجلاجل بس.. الفضيحة بقت على عينك يا تاجر وبحكم القانون. شباب عيلتي، بإشراف خالي وحسام، طلعوا الشقة.. نزلوا كل كرتونة تخص جهازي، حتى الستائر والسجاد اللي ماما جابته، حطوه في العربيات. مسبتش ورايا غير الحيطان على المحارة، والأثاث اللي طارق كان جايبه من حر ماله سيبتهوله بما يرضي الله ومخدتش منه مسمار واحد مش بتاعي. نزلت من باب العمارة وراسي مرفوعة للسما. الهوا النضيف ضرب في وشي وأنا بركب عربية خالي جنب حسام. بصيت على الشباك اللي فوق، شباك الشقة اللي كنت فاكرة إني هعيش فيها وأبني حياتي.. حسيت بوجع خفيف في قلبي، بس الوجع ده كان مفيش جنبه حاجة قصاد راحة الضمير. أمي كانت واقفة مستنياني على باب بيتنا القديم في شبرا، أول ما شافتني حضنتني وعيطت، وقالتلي: — «حقك رجعلك يا قلب أمك.. واللي يخرج من بيت الحرام سليم، ربنا بيعوضه بالدهب الصافي اللي مبيصديش.» قعدت في سريري القديم وسط كراتيني وحاجاتي النضيفة، وأنا حاسة لأول مرة من سنين إني بنام مرتاحة البال. العدل مكنش بس إن الحرامية يتعاقبوا والشرطة تاخدهم، العدل الحقيقي كان إني عرفت قيمة نفسي، وإن الست اللي تفرط في أدق تفاصيل كرامتها بحجة "عشان المركب تمشي"، بتصحى في يوم تلاقي المركب غرقت بيها في أوحل قاع. حماتي ومعتز خدوا جزاءهم في المحاكم، وطارق بعت ورقتي بعد شهر ومعاها كل حقوقي مليم ينطح مليم من غير محاكم ولا قواضي لأنه عارف كويس إن بنتي وعيلتي أصحاب حق.. وأنا.. بدأت حياتي من جديد، بقلب نضيف، وجهاز مستور، وشمس بتطلع عليا وأنا حرة ومرفوعة الراس.

مقالات ذات صلة

بعد إطلالة بدلة الر;قص.. رد فعل غير متوقع من محمد رمضان على الهجو.م عليه

بعد ما ولدت

خطيبي مات

اتجوزت واحد

ما الذي يحدث لجسمك لو توقفت عن تناول السكر 30 يوما

بطل مسلسل ليالي الحلمية فى دار المسنيين.. من هو جمال صالح؟

اترك تعليقاً إلغاء الرد