كل تلت شهور

ل تلت شهور تقريبًا بتنزل بلدنا واحدة ست عجوزة اسمها دهب، بتلف في البلد بتاعتنا وهي راكبة فوق جمل ضخم والناس من وراها بيفضلوا يرحبوا بيها ويعزموا عليها عشان تدخل أي بيت ويكرموها، وده لأن دهب كانت أشهر عرافة بتقرأ الطالع والفنجان، وكانت شيخة وليها كرامات كتير أوي.. وسمعنا عنها ألف حكاية وحكاية كمان، بس أشهر حكاية بتقول إن دهب كانت بنت لقيطة ومحدش عارف مين أهلها إطلاقًا، وكانت دايمًا بتروح تنام عند الضريح اللي فوق الجبل، لحد ما لاقاها الشيخ جابر أشهر راجل في المحافظة كلها وبدأت تتعلم على إيديه لحد ما تفوقت عليه وبقا ليها خُدام من الجن بيساعدوها واتكشف عنها الحِجاب كمان. . ومن وقتها وهي بتظهر في أكتر من بلد على فترات محددة، تلف في البلد بالجمل الضخم بتاعها واللي كان عليه هَودج ضخم بتقعد فيه، والستات يفضلوا يرحبوا بيها ويزغرطوا لحد ما توصل بيت في آخر البلد بتقعد فيه ٧ أيام تستقبل الزيارات وطبعًا أغلبهم بيكونوا ستات، وبعدها تسيب البلد وتروح بلد تانية.. في اليوم ده كنت بنضف البيت مع مرات أبويا وسمعت صوت الزغاريط والهيصة برة، وعرفت إن دهب معدية من قدام البيت بتاعنا، شوية واختفت الأصوات، لقيت مرات أبويا بتقترح عليا أروح لدهب بما إن كتب كتابي اتكتب وفرحي بعد شهر واحد عشان تعملي حِجاب أو حاجة تمنع عني الحسد أو الشر، خاصةً إني هتجوز ابن عمي اللي كل بنات البلد يتمنوا بس إنه يبص في وشهم. . فكرت في كلامها شوية لقيته كلام منطقي، بس بعد تفكير أكبر حسيت إني ممكن أشيل ذنب لو عملت كدا، وتاني يوم لما لقيت مرات أبويا بتفكرني بالموضوع، قولتلها إني صرفت نظر تمامًا عنه ومش هروح لدهب، في النهاية بعض الشيوخ بيقولوا عنها إنها دجالة كبيرة وحرام إننا نستعين بيها.. مرات أبويا وقتها بصتلي بصة استهزاء وسكتت، وتاني يوم وبالصدفة البحتة تحصل مشكلة بيني وبين ابن عمي، وجه البيت وقعد معايا أنا وأبويا ومرات أبويا وفضل يشتكي كتير أوي من أفعالي، مرات أبويا قالت إننا محسودين وكلت دماغه عشان يهدى شوية والأمور نوعًا ما اتحلت وساب البيت ومشي، وقتها بصت لأبويا وقالتله: ـ بنتك مش هتم جوازتها لو مراحتش لدهب عشان تحصنها بحاجة. . أبويا بصلي بصة طويلة وقال: ـ أيوة أنتي لازم تروحي لدهب عشان أنا مش ضامن الناس وقرفهم.. رديت عليه وقولت: ـ الشيخ عبد الوهاب قال إنها دجالة ومينفعش نروحلها من الأساس.. أبويا متكلمش بس حسيت إنه ممكن يزعل لو مروحتش، خاصةً إن وشه قلب مرة واحدة كدا، وفي النهاية قولتله إني هروح عشان خاطره هو وبس، مرات أبويا ابتسمت وطمنته وقالت إنها كمان هتروح معايا، في الحقيقة أنا وعيت على الدنيا ملقتش غيرها، ومشوفتش منها أي حاجة وحشة، وبرضه حسيت إنها ممكن تزعل مني لو معملتش كدا لأنها عارفة كويس أوي الستات في بلدنا بيفكروا ازاي، وكمية الكوارث اللي بتحصل للبنات بعد ما الست دي بتمشي. . وفعلًا خدنا ميعاد من الست دهب ولبسنا هدومنا وطلعنا على البيت اللي في آخر البلد، كان الجو ليل وكنا قاصدين ده عشان محدش يعرفنا، وده لان وجودك عند الست دي مهما كان شُبهة، دخلنا على الست اللي كانت جايبة حلة كبيرة وحاطة فيها مية وعمالة تقلبها بطريقة غريبة، طلبت مننا نقعد قدامها.. ببص في الحلة وأول ما بصيت صرخت من الخضة، بصتلي بغضب، فكتمت نفسي وسكتت، كان فيه قرموط أسود شكله بشع جوة الحل وعمال يتحرك، طلبت مننا نتكلم وبدأت مرات عمي تتكلم، قالت إني مكتوب كتابي وهتجوز ومحتاجين أي حاجة تحميني من نظرات الناس.. خدت مني شعرتين، حطت واحدة منهم على القرموط اللي بدأ يتحرك بسرعة لحد ما حسيت بقشعريرة غريبة في جسمي، وجابت قطعة قماش كتبت عليها ومسحت بيها جسم القرموط وعقدتها وقالتلي أعملها سلسلة وأعلقها في رقبتي، والشعرة التانية هتعمل بيها حجاب وتدوبه في المية عشان الحماية تبقا مضاعفة. . شكرناها واديناها مبلغ مالي كبير ومشينا فورًا من المكان، مرات أبويا بشرتني وفعلًا كنت حاسة إني أمنت نفسي كتير، بعد ما اقتنعت إن فعلًا ممكن حد يعملي حاجة ويبوظ فرحتي كلها، وطلعت على أوضتي عشان أنام، بس وأنا نايمة حسيت بهبدة قوية على أرض الأوضة، كأن فيه حاجة تقيلة أوي بتدب جنب السرير. . فتحت عيني وقمت وأنا مخضوضة، ومسافة ما فتحت عيني لقيت وش ضخم أوي قدام وشي بالظبط، وش شبه وش الجمل الضخم، ولسانه عمال يلعق في وشي، من قوة الخضة صرخت صرخة رهيبة وفقدت الوعي، معرفش فضلت على كدا أد إيه بس في النهاية صحيت، صحيت لقيت الجو نهار، افتكرت اللي حصل وقولت يمكن كابوس، وحمدت ربنا إن محدش جه على صوت صرختي، وعدى اليوم عادي وكنت تقريبًا نسيت الكابوس إياه تمامًا. . وعلى بالليل سمعت نفس صوت الهبدة من تاني، فتحت عيني وأنا بترعش ومتخيلة إني ممكن أشوف نفس الجمل ده تاني، بس الغريب إني مشفتش أي حاجة، غير إني كنت جوة مكان غير الأوضة بتاعتي، مكان قديم أوي بالطوب اللبن عامل زي الزريبة، وقفت وأنا بترعش في قلب المكان وعقلي هيولع من كتر التفكير، أنا جيت هنا أمتا وازاي. . وقبل ما أتحرك سمعت صوت زمجرة وحركة غريبة، ببص قدامي لقيت جمل ضخم، ومن فمه بتنزل المادة اللي عاملة زي الرغوة، بس كان لونها أسود وشكلها مُقزز جدًا، وقبل ما أتحرك الجمل خبطني ووقعني في الأرض وبدأ يعض بأسنانه الضخمة في جسمي، كان بياكلني حرفيًا وبيق. طع لحمي.. صرخت بهيستريا، صرخت وحاولت أهرب منه بس مقدرتش، وفضل يق. طع في جسمي وفي هدومي ويهرسني برجله وأنا حاسة إن عضمي بيتكسر ولحمي بيتقطع والد م بيسيل مني، لحد ما فقدت الوعي تمامًا وقولت أنا خلاص مُت.. بس الغريب إني صحيت لقتني نايمة على سريري عادي جدًا، بس كان جسمي عليه علامات خربشة كتير أوي، ووجع في كل حتة في جسمي كأني مضروبة علقة مـ ـوت، بكيت كتير أوي وفضلت في الأوضة بتاعتي طول اليوم، حاسة إني عملت مصيبة في حق نفسي، وإن الست دي عملتلي حاجة ويمكن تأذيني أكتر وأكتر. . وفي الليلة التالتة كان الحلم واقعي أكتر، وشوفت نفسي جوة تابوت ضيق أوي والغطا بتاعه مفتوح، ومن فوقي الجمل بينهش فيا ويدك في جسمي برجليه، لدرجة إني حرفيًا سمعت صوت عضمي وهو بيتكسر، وصحيت وأنا حاسة إن فعلًا جسمي كله اتكسر، وكأني طالعة من حادثة مـ ـوت.. صحيت ومشيت في الشوارع وأنا ببكي زي المجنونة ومش عارفة أنا ممكن أروح فين، ووسط حيرتي ودموعي خبطت واحدة ست غصب عني، بصتلها وحسيت برهبة غريبة، كانت ست عجوزة أوي وعنيها فيها ثبات رهيب، لقتها بتهمس في ودني وبتقول: ـ السر في الجمل روحيله. . قالت الكلمتين دول ومشيت من قبل ما أنطق بنص كلمة، رجعت على البيت وأنا حاسة برعب غريب، هي تقصد الجمل بتاع دهب، طيب هروحله ازاي، وقصدها أروح أق. تله ولا أروح أخليه يموتني، وفضلت طول الليل ببكي وخايفة لحد ما نمت قبل الفجر.. ومسافة ما نمت حسيت بحاجة بتشدني بقسوة من هدومي وبترميني في الأرض بعنف شديد، وقضيت نصف ساعة من الرعب كبروني سنين طويلة، وبدون وعي مني خدت سكـ ـينة وطلعت على بيت دهب. . لما روحنا كان الجمل بتاعها، مربوط ورا البيت وشوفته، كان الجو ليل والفجر خلاص هيأذن، وأول ما وصلت عند بيتها لقيت الفجر بيأذن، حسيت بسكينة مع صوت الأذان واتشجعت أوي، كأن صوته حماية كبيرة ليا.. ببص لقيت الجمل مربوط ورا البيت وعليه الهودج الكبير اللي بتقعد فيه، أول ما الجمل شافني بدأ يزوم بس مقامش من مكانه، قربت منه وأنا مرعوبة بس كان لسة صوت الأذان شغال في كل حتة. . كنت بقرب منه بالسكـ ـينة وبفكر إني هق. تله، بس، بس جالي هاجس غريب، وجريت أفتش في الهودج الكبير اللي عليه.. «حي على الفلاح» فتشت ودورت مرة واتنين بس مفيش حاجة خالص.. «حي على الفلاح» وفجأة لقيت زي فتحة في الهودج من تحت وفوق سنام الجمل.. «الله أكبر الله أكبر» وفجأة لقيت كمية أعمال ممكن توصل لألف عمل في المكان ده. . «لا إله إلا الله» ومسافة ما الأذان خلص الجمل قام يزوم بهيستريا ووقعت من فوقه، وبدأ يصرخ وكأنه إنسان حقيقي، وسمعت صوت جاي من جوة بيت دهب، ومستنتش لحظة واحدة ورجعت على البيت وأنا بترعش، كان باقي يومين تقريبًا ودهب تسيب البلد، يومين قضتهم في رعب رهيب بسبب الجمل اللي بيظهر ده كل ليلة.. واستنيت، استنيت لحد ما سمعت الزغاريط إياها، كانت دهب ماشية بالجمل بتاعها، وقتها بصيت فوق سطح من السطوح للواد الصغير اللي يعتبر أنا مربياه، وبدون تفكير مسك حجر ضخم وحدفه في دماغ دهب اللي صرخت ووقعت من فوق الجمل، الناس كلهم اتجمعوا على صراخها، ولقينا راسها بتنزل د م كتير، الكل كان مشغول معاها إلا أنا.. في لحظة كنت مديت إيدي في الهودج بعد عناء وطلعت الأعمال إياها ورمتها في الأرض.. الناس وقفوا مصدومين حرفيًا، رغم علمهم إنها أكيد بتاعة أعمال، بس محدش يعرف إنها بتخبي أعمالها في هودج الجمل وتروح وتيجي بيها، وأنا مستنتش لحظة، وقولت إنها بتعمل أعمال عشان تموت الناس، وكل حد من البلد له عمل وسط دول.. الناس مستنوش لحظة، مسكوها بغضب رغم إنهم عارفين ده، بس وقت الحقيقة اللي بتتشاف بالعيون بيكون رد الفعل مختلف، طلعوا من هودج الجمل أكتر من ألف عمل في حجم الحصى، وكل عمل كان باسم حد من أهل البلد، وسلموها للمركز كمان.. ومن وسط الأعمال كان فيه عمل ليا فيهم، بس قبل ما تختفي من قدامي قالت كلام غريب أوي، قالت: ـ مرات أبوكي اللي خلتني أعملك عمل أنتي كمان. . ومن حسن حظي أبويا كان واقف وسط الناس، مسكها وكان هيموتها، وعرفنا إنها بتكرهني ومش عاوزة جوازتي تتم، حقد وغيرة، وأوهمتني إنها بتساعدني عشان تبعد الشبهات عنها واتفقت مع دهب وودتني بكامل إرادتي عشان اتوهم واتسحر بمزاجي وبشعر من راسي كمان.. حمدت ربنا إنها عدت على خير، ومعرفش ليه في خطبة الجمعة سمعت ميكروفون الجامع والشيخ بيقول حديث وصف حالتي كلها (من التمس رِضا اللهِ بسخَطِ الناسِ؛ رضِيَ اللهُ عنه، وأرْضى عنه الناسَ، ومن التَمس رضا الناسِ بسخَطِ اللهِ، سخِط اللهُ عليه، وأسخَط عليه الناسَ) أخرجه الترمذي فعلًا أنا عملت المعصية دي وروحت لدجالة عشان أرضي أبويا ومراته، واكتشفت إني عملت ده عشان ربنا يسخط عليا وكانت نهايتي صعبة أوي، يمكن فهمت بعد عناء. . لازم تعمل الصح ولو الدنيا كلها هتسخط عليك، قول الحق ولو هتزعل صاحبك، أنصح بالخير ولو هيتضايقوا منك، لأن ربنا وعدك لو عملت ده عشانه هو هيرضى عنك، وهيجبرهم يرضوا عنك، والعكس صحيح.. بقلم/ أحمد محمود شرقاوي

مقالات ذات صلة

اليوم السابع

اخرسي من

بعد فرح اختي بيوم

كده مينفعش

روحت للمحامي

جوزى بيحرجنى أمانى السيد

اترك تعليقاً إلغاء الرد