جوزي كان مخبي
فسيبته ودخلت الأوضة.
لكن لأول مرة…
زعلت بجد.
تاني يوم في المستشفى قررت أتعامل عادي.
هو دكتور كبير في القسم.
وأنا طالبة دراسات عليا.
وخلاص.
لا هبصله.
ولا هفكر في اللي حصل.
ولا هسأله.
لكن المشكلة إن زميلي، ياسين، لقاني في الكافتيريا.
قعد قدامي وقال:
— أنا عملتلك حاجة امبارح؟
قلت باستغراب:
— ليه؟
— الدكتور عاصم كان هيق/تلني بعينه.
ضحكت غصب عني.
— لا طبعًا.
— طب القهوة ذنبها إيه؟
— معلش، هات غيرها.
ابتسم:
— أجيبلك دلوقتي؟
وقبل ما أرد…
سمعت صوت بارد جدًا من ورايا:
— عندك اجتماع مع الدكتور سامح بعد عشر دقايق.
لفيت.
عاصم.
قلت:
— عارفة.
— يبقى المفروض تكوني فوق.
ياسين قام فورًا:
— صباح الخير يا دكتور.
عاصم رد عليه باقتضاب.
وأنا قمت وأنا بكتم ضحكتي.
عديت من جنب عاصم وهمست:
— المرة دي شاي، ماتقلقش.
سمعت نفسه اتغير.
لكن ما ردش.
في الاجتماع، كنت بعرض جزء من البحث.
عاصم كان قاعد في آخر الترابيزة.
ولا مرة بصلي بشكل مباشر.
لكن كل ما حد يسألني سؤال صعب، كنت ألمحه بيرفع عينه فورًا.
وفي مرة دكتور قاطعني بطريقة ضايقتني.
قبل ما أرد، عاصم اتكلم:
— خليها تكمل فكرتها الأول.
القاعة سكتت.
كملت.
وبعد الاجتماع، وأنا بجمع ورقي، الدكتور سامح قال:
— واضح إن الدكتور عاصم مقتنع بشغلك جدًا.
ابتسمت:
— الحمد لله.
سمعت صوت بنت من ورايا:
— محظوظة.
لفيت.
كانت الدكتورة ريم.
من أشهر الدكاترة الشباب في القسم.
جميلة، أنيقة، وواضح جدًا إنها قريبة من عاصم.
قالت بابتسامة:
— الدكتور عاصم نادر جدًا لما يدافع عن حد بالشكل ده.
قلت:
— يمكن علشان البحث كويس.
ابتسمت:
— أكيد.
وبعدين بصت ناحية عاصم اللي كان واقف بعيد.
وقالت:
— هو عمومًا صعب جدًا في التعامل… بس لما تعرفيه أكتر هتكتشفي إنه مختلف.
بصيتلها.
“لما تعرفيه أكتر”؟
هو فيه أكتر من إني بصحى ألاقيه نايم جنبي كل يوم؟
لكن ابتسمت:
— أكيد.
وفجأة راحت ناحيته.
وقفت جنبه.
قالتله حاجة وضحك.
عاصم…
ضحك.
أنا شخصيًا بقالي تلات شهور متجوزاه، وممكن أعد المرات اللي شوفته فيها بيضحك على صوابع إيدي.
حسيت بحاجة سخنة طلعت جوايا.
وقلت لنفسي:
لا.
أنا مش غيرانة.
مستحيل.
إحنا أصلًا جوازنا اتفاق.
لكن لما ريم لمست دراعه وهي بتتكلم…
لقيت نفسي ببص لإيديها.
وبعدين بصيت لعاصم.
وفي اللحظة دي…
رفع عينه.
شافني.
نظراتنا اتقابلت.
