لو سمحت
رواية الكاتبة ملك إبراهيم.
في فيلا نصار..
الفيلا كبيرة وهادية.. والد سليم كان قاعد في أوضة المكتب بتاعته قدام التلفزيون بيتابع الأخبار اللي بقت كلها لصالح العيلة والمستشفى.. عرف من الأخبار ومن مواقع السوشيال ميديا ان سليم أعلن ان البنت دي مراته.. ومهتمش كتير هي مين ولا فقيرة ولا غنية.. لان كل اللي كان همه اسم العيلة وسمعة المستشفى.. وهو شايف ان سليم قدر يحل كل المشاكل بذكاء باعلان زواجه من البنت.. شايف انه تصرف راجل ومسؤول.
والدة سليم كانت هتتجنن في الصالون.. قاعدة لابسة روب حرير وبتفرك ايديها من التوتر وبتكلم في التليفون ومحدش بيرد عليها.. كانت هتتجنن بعد اعلان خبر زواج ابنها من البنت الفقيرة دي.. البنت اللي كانت بتشتغل عندهم في المستشفى .. واللي جننها أكتر ان جوزها مش مهتم غير باسم العيلة وسمعة المستشفى ومتقبل جدا اللي سليم عمله.. كأنه بيقوله برافو.
رجع سليم البيت في وقت متأخر بعد يوم متعب جدا عليه.. داخل الفيلا الساعة 12 بالليل.. تعبان ومرهق.. ركن عربيته ودخل.
لقي والدته منتظراه في نص الصالة واقفة مربعة ايديها ووشها مقلوب.
أول لما دخل سألته بنبرة حادة وعالية كلها غضب : “ليه مش بترد على تليفونك يا سليم.. انت اتجوزت البنت دي فعلا؟ البنت بتاعة الاستقبال اللي بتشتغل عندك ؟ رد عليا” سألته بغضب.
خرج والده من المكتب بتاعه وبيقول بثقة وهدوء وهو بيبص لسليم بفخر: “ده أحسن حل انت عملته يا سليم عشان تخرج من الأزمة دي.. برافو عليك.. كل الأخبار اتحولت لاعلان كبير للمستشفى.. كل الناس بتدعمك بعد اللي حصل.. واسم المستشفى بقى في حتة تانيه .. انت اتصرفت صح”.
اتكلمت والدة سليم بصراخ وجنون وهي بتبص لجوزها: “اعلان ايه وزفت ايه اللي بتتكلم عنه.. ابنك اتجوز البنت الفقيرة دي.. انت فاهم يعني ايه؟ بقى مرات ابني أنا تبقى البنت دي .. وسما.. هنقولها ايه؟ ولا هي ولا مامتها بيردوا عليا من الصبح.. فضحنا نفسنا قدامهم.. انت فاهم؟” قالتها بصراخ وانهيار.
وبصت لسليم وقربت منه ومسكته من دراعه وقالت برجاء وصوت مليان أمل: “انت اتجوزتها عشان تحل المشكلة وبعدين هتطلقها صح؟ صح يا سليم؟ قول انك هتطلقها بعد ما الموضوع يهدى.. قول” قالتها وهي بتبص في عينيه مستنية يقول آه.
